الصلاة ......... يارب رجعني اليك

مفيش شك ان أهم حاجة ممكن توصلنا هى الصلاة

ناس كتير لسه لم تدرك قيمتها ولم تتذوق حلاوتها

الصلاة دى ببساطة جاية من كلمة صلة يعنى علاقة ، واحنا حتى فى المثل الشعبى عندنا بنقول :

تعرف فلان ؟ ... أه اعرفه

عاشرته ؟ ... لا معشرتوش

يبقى متعرفوش .!

أهى الصلاة بالظبط نفس الموضوع ...

تعرف ربنا ؟ ... اه طبعا دا انا بينى وبين ربنا عمار كبير

طب بتصلى ؟ بتكلمه ؟؟ ... لا مبصليش

يبقى لسه معرفتش حاجه عن ربنا

الصلاه هى الصلة الوحيدة اللى بتربطنا بربنا . واليوم اللى متصليش فيه يبقى قطعت الصله دى .

شوف انا عايز انبهك لحاجة مهمة جدا لازم تفضل دايما حافظها فى دماغك

الشيطان ممكن يسيبك تعمل كل الخير اللى فى الدنيا من غير مايعوقك

يسيبك تساعد ده وتزور ده وتخدم فى مجالات كتير ، ده ممكن هو اللى يساعدك
كمان ويسهلك خدماتك عشان فى الأخر يوقعك فى الكبرياء وساعتها يفصلك تماما
عن ربنا

لكن انه يسيبك تقف تصلى دى اللى مش ممكن ينولهالك بسهولة ابدا

دى الحاجة الوحيدة اللى لازم يحاربك فيها بكل قوته عشان دى الحاجة الوحيدة اللى بتحرقه وتهزمه

الصلاة هى الحاجة الوحيدة اللى تخليك فى علاقة مع ربنا

الشيطان لو شايفك شغال فى خدمات واعمال صالحة كتير ومش بتصلى . يبقى ولا
هيعبرك ولا هيضايقك لأنه كده هو ضمن انك تبعه ومنفصل عن الله خلاص

عايز بقى تعرف ليه الصلاة دى اقوى سلاح فى الوجود ؟؟

تأمل معايا كده فى حاجة بسيطة وجاوبنى ... أزاى جبل المقطم يتنقل من مكانه 3 كم ؟؟

لو جبت كل جرارات وأوناش العالم كله يقدروا يحركوه 1 سم بس ؟؟؟ طبعا مستحيل . لكن الصلاة قدرت مش تحركه 1 سم لكن 3 كم

هل كل دكاتره العالم بكل تخصصاتهم يقدروا يحيوا انسان خلاص مات ؟؟؟ طبعا مستحيل

لكن الصلاة قدرت تقيم الأموات وسير قديسينا مليانة بكده

كنا بعتنا فى اول رسالة من رسايل بستان الرهبان عن الأنبا بيصاريون ، هو
انسان عادى زيك وزيى لكنه عرف قيمة الصلاة واختبرها فى حياته وبجمله واحدة
منه وقف حركة الكون كله ودوران الكواكب والشمس عشان كان فى الصحراء مع
تلاميذه ، والشمس كانت هتغرب عليهم قبل ما يوصلوا مكانهم ولو كانت الشمس
غربت كان ممكن يتوهوا فى الصحراء فصلى إلى الله فى جملة واحدة والله
وقفلوا حركة الكون كله عشان خاطره . شفت عظمة الصلاة اللى بتخليك تفتح
السما بكلمة منك !!!

عرفت ليه الصلاة اقوى سلاح فى الوجود ؟؟ عشان ببساطة حطمت كلمة " مستحيل "

عايز بعد كل ده انه يكون فى ايدك السلاح العملاق اللى اسمه الصلاة وتفضل لسه كسلان ومتستخدمهوش ؟؟ تبقى مش زكى ولا حكيم كمان

اذا كنت لسه من الناس اللى هما مجربوش يصلوا قبل كده . لازم تبدأ من انهاردة

والموضوع سهل وبسيط وخده بالتدريج

اكتفى بصلاة أبانا الذى فى السموات اول ماتصحى من نومك وقبل ما تنام ، صدقنى دى مهمة قوى عند ربنا . عارف ليه ؟

لأن انت كنت نايم فى سريرك مرتاح ومتغطى ببطانية . لكن فى غيرك كان نايم
فى المستشفى وفى غيرك كان بايت فى قسم شرطة طول الليلة دى وفى غيرك اللى
كان بايت فى شقة مشبوهة وبيعمل خطية وفى غيرك اللى كان نايم بيتألم من وجع
طول الليل ومقدرش ينام اصلا وبرده فى غيرك اللى نام ومقمش

يبقى ربنا اللى حفظك من كل الشرور دى ميستاهلش كلمة شكر اول ماتصحى

ميستهلش منك كلمة صباح الخير ياربى يا حبيبى وتصلى ابانا الذى فى السموات .

انت كمان هتحس بالبركة طول يومك لما تبدأه بربنا وبالصلاة حتى لو كانت قصيرة

كمان مهمة "ابانا الذى" قبل ما تنام . لأنك لازم تشكره انه كان معاك طول
اليوم وحفظك من شرور كتير ووصلك فى اخر اليوم لحد سريرك عشان تنام ،

كمان برده مهم انك تنهى يومك بربنا والكلام معاه زى ما بدأت معاه . لأنه هو البداية والنهاية .

وحتى لو بعد الشر نمت ومقمتش يبقى اخر حاجة طلعت من قلبك وفمك هى صلاة وكلام الله

عشان كده الصلاة قبل النوم مهمة جدا زى الصلاة أول ما تصحى

وطبعا انا بتكلم ان " ابانا الذى " كبداية ليك لو مكنتش لسه لم تبدأ لكن
لازم تنموا فى الصلاة طبعا بس اهم حاجة انك تبدأ ، والنمو ده هيكون مع
الوقت طبعا إنشاء الله

دلوقتى هى دى فرصتك عشان تبدا تفتح علاقة مع ربنا . علاقة حقيقية حية

+ لانه يقول في وقت مقبول سمعتك و في يوم خلاص اعنتك هوذا الان وقت مقبول هوذا الان يوم خلاص ( 2كو 6 : 2 )

من فضلك مضيعش الفرصة من إيدك لأن لو عندك شعور بأنك عايز تبدأ دلوقتى استغل الشعور ده وقوم دلوقتى وكلم ربنا وقوله

اقبلنى يارب إنى ابدأ معك حياه جديدة الأن هنا على الأرض عشان اقدر اكملها معاك هناك فى الملكوت .

وزى ما قلتلك ان الصلاة دى هى الصلة اللى بتربط بينك وبين ربنا ، لو فى يوم مصلتش تنقطع الصلة دى

الصلاه هى الصلة
الوحيدة اللى بتربطنا بربنا . واليوم اللى متصليش فيه يبقى قطعت الصله دى .

اكيد طبعا الصلاة سلاح قوي جدا و حاجه تربطنا بربنا ولو انقطعت يبقي احنا منفصلين عن ربنا

شكرا ملاك لتعبك و موضوع حلو عن الصلاة

ربنا يخليك يا اندرو
ياريت نرجع نصلى زى زمان ونتمتع بعشرة ربنا

الصلاة دي اهم حاجا في العلاقة بينا مبين ربنا وياريت نحافظ علي العلاقة دي ومنقطعهاش

تسلم ايدك يا ملاك علي المجهود الرائع والموضوع الجميل دا

[ندعوك للتسجيل في المنتدى أو التعريف بنفسك لمعاينة هذه الصورة]

شكرا على المضوع يا ملاك

شكرا يا ملاك موضوع جميل وياريت منبعدش عن ربنا ونرجعله تانى زى الاول واكتر

موضوع جميل جدا
ميرسي ملاك
مجهود رائع

شكرا ياملاك
موضوع جميل جدا

» نحتاج اليك يارب
» شريط ( ادنو اليك ) من اروع شرايط المرنم مهيب مخلوف
» لو سمحت يارب خلى بالك من نفسك
» يارب
» إلى متى يارب تنسانى؟؟!!